თბილისის "დინამომ" საწყის 21 წუთში გადაწყვიტა მატჩის ბედი. ჯერ კოტომ, შემდეგ კი ჯაბა ჯიღაურმა გაიტანეს, რაც საკმარისი აღმოჩნდა 3 ქულის ასაღებად. გორის "დილა" სუსტად არ გამოიყურებოდა, თუმცა, ისიც აშკარაა, რომ ეს გუნდი ჩემპიონატის პირველ წრეში უკეთ თამაშობდა – შედეგიც ოდნავ უკეთესი ჰქონდა და სანახაობრივი მხარეც. "დინამომ" კი მოიგო, მაგრამ საეჭვოა, ეს ქულები საუკეთესო 8 გუნდს შორის გადაჰყვეს, რადგან "დილას" "რვეულში" მოხვედრის შანსი მცირეა. მე-2 წრის დასრულებამდე 7 ტურია დარჩენილი და თემურ მახარაძის გუნდი ბოლოსწინა პოზიციაზეა, მერვეადგილოსანს კი 6 ქულით ჩამორჩება. არადა, "დინამოს" სწორედაც რომ აწყობს "დილას" "რვეულში" გასვლა, რადგან "ზესტაფონს" გორელებთან შინ 0:4 აქვთ წაგებული. რა შეხსენება გინდათ - საუკეთესო 8 გუნდს ერთმანეთში დაგროვილი ქულები გადაჰვებათ. რაც შეეხება უშუალოდ თამაშს, "დინამომ" ბლიც-კრიგი განახორციელა – მე-10 წუთზე, ჩისკომ ჭკვიანური, ქუსლური პასით გააყოლა ბურთი კარლეს კოტოს, რომელიც სწრაფად შეიჭრა საჯარიმოში და მეკარე ბექა შეყრილაძეს, ახლო კუთხეში, დაბალი ტრაექტორიის დარტყმით გაუტანა – 1:0. 21-ე წუთზე, ალვარომ ჯიღაურს გაუთამაშა ბურთი, ძლიერადაც დაარტყა და შეყრილაძემ მოიგერია, თუმცა, ჯიღაურმა დაახლოებით პენალტის ნიშნულიდან დაამატა და 2:0. ერთ წუთში "დილამ" გაიტანა, თუმცა, გოლი თამაშგარის გამო გაუქმდა, ხოლო ლორიამ დავით ჩაგელიშვილის ახლოდან დარტყმული მოიგერია. "დილა" იბრძოდა და ეს დასაფასებელია, მაგრამ "დინამო" უკეთ გამოიყურებოდა, განსაკუთრებით შემტევ ფაზაში, სადაც ალვარო, ჯიღაური და კოტო გამოირჩეოდნენ. 29-ე წუთზე, შეყრილაძემ ორჯერ გადაარჩინა თავისიანები: ჯერ ალვაროს თავური "გამოაძრო" ცხრიანიდან, მერე კი გიორგი რეხვიაშვილის ფეხით დარტყმული მოიგერია. ტაიმის ბოლოს, გუნდებმა თითო "ჩხვლეტა" კიდევ განახორცილეს: ლორიამ შეცვლაზე შესულ ნიკა სადაღაშვილს აუღო, მერე კი კოტომ თითქმის დაკარგული ბურთი მოიპოვა, ფლანგზე გაილაღა და საჯარიმოში ჩააწოდა, სადაც ჩისკო ვარდნაში ცდილობდა გატანას და ოდნავ ააცილა. რამდენადაც სანახაობრივი იყო პირველი ტაიმი, იმდენად უინტერესო გამოდგა მე-2 ნახევარი. ფაქტობრივად, არაფერი საინტერესო - საჯარიმოს მისადგომებთან იშლებოდა შეტევები. ორად ორი მომენტი: ლორია ბურთის მოგერიებისას შეცდა, თუმცა, ჩაგელიშვილის დარტყმის შემდეგ, ხელებში შეიმაგრა ბურთი. "დილას" კართან კი, ალვაროს შორიდან ოდნავ აცილებულსა და იმავე ალვაროს პასით ალბერტ იაგუეს გაცუდებულ მომენტს გამოვარჩევთ. შეყრილაძე კარიდან დროულად გამოვიდა და იაგუეს არ გაატანინა. მოკლედ, "დინამომ" თასზე ვერაფერი დააკლო "დილას" და ფრეებით გავარდა (2:2, 0:0), თუმცა, ჩემპიონატში ორიდან ორი მატჩი მოუგო.
