14 ნოემბერს თემურ მახარაძე უმაღლეს ლიგას დაუბრუნდა - გამოცდილ მწვრთნელს გორის "დილა" ჩააბარეს. ამ ამბავთან ისიც გამცნეთ, რომ შიდა ქართლის სამხარეო ადმინისტრაციასთან ერთად "დილას" ერთ-ერთი სამთავრობო სტრუქტურაც მიხედავდა.
როცა ახალი მწვრთნელის ამბავი შევიტყვეთ, დაფინანსების თაობაზე დაზუსტებულ ინფორმაციას არ ვფლობდით, თუმცა საფუძვლიანად ვივარაუდეთ: როცა მახარაძე ამა თუ იმ კლუბში მიდის, ეს იმასაც ნიშნავს, რომ იქ, ამ შემთხვევაში "დილაში", ფინანსური რესურსიც იქნება და ამბიციაც. მახარაძე არ არის ის მწვრთნელი, დათანხმდეს მუშაობას, თუ გუნდს სავარჯიშო და მოსამზადებელი პირობები არ ექნება.
გუშინ უკვე კლუბშიც დაგვიდასტურეს, რომ "დილას" ახალი პატრონი ჰყავს: პარასკევს გორში შინაგან საქმეთა მინისტრი ვანო მერაბიშვილი ჩავიდა და ქალაქის, გუნდის ხელმძღვანელებსა და ვეტერან სპორტსმენებს შეხვდა. ლაპარაკი იყო გორის განახლებასა და ქალაქის ფუნქციის გაზრდაზე, სოფლის მეურნეობისა და სპორტის განვითარებაზე, რაც 2012 წლიდან იგეგმება. ქალაქი დამატებით ფუნქციებს შეიძენს: აშენდება იუსტიციის სახლი, აქ განთავსდება ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო, ძველი გორის განახლება-გალამაზებაზე უნდა დაიხარჯოს 5 მილიონი ლარი. მოკლედ, გორი უნდა გამოცოცხლდეს და გამშვენიერდეს, ჩაოხრებული სტადიონითა და უხეირო გუნდით კი საერთო სურათი წახდება.
"დილას" დაფინანსება ყოველთვის გამგებლისა და გუბერნატორის შეხედულებაზე იყო დამოკიდებული და თანაც საორჭოფო. აქ ის დროც ახსოვთ, როდესაც ცენტრალური სტადიონიდან ფეხბურთელების გაყრა მოინდომეს.
გორი ფეხბურთისკენ ყოფილმა გუბერნატორმა ზურაბ არსოშვილმა შემოატრიალა და "დილას" ნორმალური პირობებიც შეუქმნა, მაგრამ თანამდებობიდან მისი გათავისუფლების შემდეგ კვლავ გაურკვევლობა და ტრადიციული კითხვა გაჩნდა: დაგვაფინასებენ თუ არა? პრობლემა არც ახალ გუბერნატორ გიორგი ტატიშვილს შეუქმნია, ისიც ფეხბურთის დაფინანსების მომხრეა.
ზემონახსენებ შეხვედრაზე ვანო მერაბიშვილმა თქვა, რომ ამიერიდან "დილას" შინაგან საქმეთა სამინისტრო დააფინანსებს. გორელებს ეს ამბავი ახარებთ და მადაზეც მოვიდნენ. ლაპარაკია არა მხოლოდ გუნდის დაფინანსებაზე, არამედ გორის ცენტრალური სტადიონის გენერალურ რეკონსტრუქციაზე. მთავრობისა და ფეხბურთის ფედერაციის ერთობლივი პროექტით ახალ საფარს ერთ კვირაში ჩამოიტანენ და დააგებენ, გორელები მშობლიურ არენას მეორე წრიდან დაუბრუნდებიან.
ამას გარდა, სტადიონზე აპირებენ მიშენებას, სადაც განთავსდება ახალი გასახდელები, საშხაპეები, მსაჯთა და დელეგატთა ოთახები, ძველი გასახდელები კი მასაჟის ოთახს და ფიტნეს-დარბაზს დაეთმობა. გაფართოვდება პრესლოჟა, აშენდება კომენტატორებისა და ოპერატორების სამუშაო ოთახები, მედიაკაფე.
გუნდის ხელმძღვანელებს ფეხბურთის ფედერაცია ევროპიდან ახალი განათების სისტემის ჩამოტანასა და დამონტაჟებას ჰპირდება. ინდივიდუალური სკამების დამატების შემდეგ თენგიზ ბურჯანაძის სახელობის სტადიონის ტევადობა 5 ათას ადგილამდე გაიზრდება. აწ დანგრეული ტრიბუნების ქვეშ საბჭოთა პერიოდში სასტუმრო იყო, რომელიც ახლა გავერანებულია. ახალი დამფინანსებლით შეგულიანებულ "დილაში" მის აღდგენაზეც ფიქრობენ. გათვლა პრაგმატულია - მატჩამდე ერთი შეკრების მოწყობა გუნდს 1600 ლარამდე უჯდება, საკუთარი სასტუმრო კი ხარჯებს შეამცირებს. რამდენიმე დღეში გუნდს 55-ადგილიანი გერმანული ავტობუსიც ეყოლება.
გორელები იმედოვნებენ, რომ სტადიონის განახლება თებერვლამდე დასრულდება, კარგი განათებით, მინდვრით, კეთილმოწყობილი მედიალოჟითა და ტრიბუნებით სტადიონი უეფას სტანდარტებს დააკმაყოფილებს და საერთაშორისო შეხვედრებს უმასპინძლებს, მათ შორის, ახალგაზდრული ნაკრების თამაშებსაც.
ამას გარდა, გორის გამგებელი დავით ხმიადაშვილი საფეხბურთო სკოლას ხელოვნურსაფრიანი მოედნის მოწყობას დაჰპირდა.
ყოველდღიური სპორტული გაზეთი "ლელო"
|