თასიდან "დინამოს" გამოგდებით შიდა ქართლელებმა კიდევ ერთხელ დაამტკიცეს, რომ ნებისმიერი მეტოქის გამწარება შეუძლიათ. ამიტომ ფავორიტის რანგში მყოფი ქუთათურები გორელებთან დაპირისპირებას ფრთხილად ეკიდებოდნენ.
სტუმრებმა მართლაც დიდი წინააღმდეგობა გაუწიეს მეტოქეს და ქუთაისიდან ქულაც რომ წაეღოთ, არც ეს იქნებოდა მოულოდნელი. თუმცა გია გეგუჩაძის შეგირდებმა მეორე ტაიმში შეძლეს სტუმრების გატეხვა და ჩემპიონატში ზედიზედ მეექვსე გამარჯვების მოპოვება. ამ მოგებით "ტორპედო" სატურნირო ცხრილის სათავეში მოექცა, თუმცა აქ ისიც უნდა ვთქვათ, რომ "კოლხეთი"-"ზესტაფონი" უამინდობის გამო გადაიდო და ცხრილზე ამანაც იქონია გავლენა.
მატჩის პირველი ნახევარი თანაბარ ბრძოლაში წარიმართა. ქუთათურები, რომლებიც ამ შეხვედრაში ორი საყრდენით (დიღმელაშვილი-ჩიკვილაძე) თამაშობდნენ, უპირატესობის მოპოვებასა და ბურთზე კონტროლის დამყარებას ცდილობდნენ, მაგრამ გორელების სასახელოდ უნდა ითქვას, რომ მათ მეტოქეს სივრცეები არ დაუთმეს და თავისუფლად მოქმედების საშუალება არ მისცეს. მე-14 წუთზე გორელთა კართან კუთხური დაინიშნა, ქუთაისელთა ფანკლუბი "ბაიანო გოლი"-ს სკანდირებას მოჰყვა. "ბაიანო" დავით გამეზარდაშვილის მეტსახელია და მანაც თითქოს გულშემატკივრების თხოვნა გაითვალისწაინაო, დოლიძის კუთხურის შემდეგ ჩვეულ სტილში, თავურით ბექა შეყრილაძეს შანსი არ დაუტოვა - 1:0.
გოლს გორელები არ დაუბნევია, პირიქით, გააქტიურდნენ და ქუთაისელ მცველებს საქმეც მოეძალათ. ვალტერ ხორგუაშვილის ახლოდან დარტყმული ბურთი გამეზარდაშვილმა ვარდნით გამოიტანა, თუმცა გორელთა ნახევარმცველმა მეორე შანსი კარგად გამოიყენა. ამ ეპიზოდში აღსანიშნავია დავით ჩაგელიშვილის ბრწყინვალე გადაცემა, რომელმაც ქუსლით პასით ხორგუაშვილი კარგ პოზიციაზე გაიყვანა, მართალია, ვალტერს სევასტი თოდუა უშლიდა ხელს, თუმცა კარში დარტყმა მაინც მოახერხა, ბურთი ჯერ ქუთაისელ მცველს შეეხო და წინ გამოსული მიგინეიშვილის კარში უცნაური ტრაექტორიით ჩაეშვა - 1:1.
ტაიმის შუაწელიც გორელების უპირატესობით მიმდინარეობდა და გატანის არაერთი შანსიც ჰქონდათ, თუმცა ტაიმის ბოლოს თავად გადაურჩნენ გოლს: დიღმელაშვილის შორიდან და ძლიერად დარტყმულმა ბურთმა სტუმართა კარის ხარიხა შეაზანზარა.
გია გეგუჩაძეს მეორე ტაიმში განხორციელებულმა ცვლილებებმა გაუმართლა. გია მეგრელაძემ დიღმელაშვილის კარგი გადაცემა გამოიყენა და შეყრილაძეს ვარდნით გაუტანა - 2:1. ამ გოლის შემდეგ გორელები ბევრს ცდილობდნენ, მაგრამ ქუთაისელი მცველებიც უშეცდომოდ ირჯებოდნენ, შემდეგ კი თანდათან უპირატესობა მასპინძლების ხელში გადავიდა და მატჩის მიწურულს რიონისპირელებს ანგარიშის გაზრდაც შეეძლოთ.
საბანაძის აქტიურობას შეყრილაძის კარში ზედიზედ ორი დარტყმა მოჰყვა, გორელთა კიპერმა ჯერ დავით ბოლქვაძეს აუღო, შემდეგ კი იოსელიანის ძლიერი დარტყმაც გააუვნებლა. სტუმრებმა თამაშის ბოლოსაც გაიბრძოლეს და რაჟამაშვილმა სახიფათოდაც დაარტყა, მაგრამ ბურთს მცველი გადაეღობა. მატჩიც მალე დასრულდა და ქუთაისელმა გულშემატკივრებმა გალიდერება იზეიმეს.
რამაზ სოღოლაშვილი ("დილა"): "სანახაობრივად ძალზე კარგი თამაში გამოვიდა. მატჩს ორივე გუნდისათვის პრინციპული მნიშვნელობა ჰქონდა. სამწუხაროდ წავაგეთ, ნორმალურად ვითამაშეთ, მაგრამ მეორედ გათანაბრება ვეღარ მოვახერხეთ. ტორპედოს კარგი გუნდი და მწვრთნელი ჰყავს და წარმატებებს ვუსურვებ".
გია გეგუჩაძე ("ტორპედო"): "ვიცოდით მეტოქის ძალის შესახებ. ძალზე დაძაბული მატჩი გამოვიდა. ჩვენს თამაშში ჯერჯერობით ბევრი რამ არის დასახვეწი და დასალაგებელი. შეიძლება ვთქვათ, რომ პრინციპული თამაში მოვიგეთ. მართალია, შედეგი კარგი გვაქვს, მაგრამ თამაშში ბევრი წუნი გვაქვს, რომლის გამოსწორებაზეც ბევრი მუშაობა დაგვჭირდება".
"ტორპედო" - "დილა" 2:1 (1:1)
6 ნოემბერი. 18:00. ქუთაისი. "ცენტრალური". 1500 მაყურებელი
"ტორპედო": მიგინეიშვილი, დაჩი ფოფხაძე, სევასტი თოდუა, გამეზარდაშვილი, გურული, დიღმელაშვილი, ჩიკვილაძე (იოსელიანი, 53), დოლიძე (საბანაძე, 74), ბოლქვაძე, თარხნიშვილი, გოცირიძე (მეგრელაძე, 61).
მთავარი მწვრთნელი: გია გეგუჩაძე
"დილა": შეყრილაძე, გველესიანი, ბაქრაძე, მაჭავარიანი, ჭითანავა, ჯოჯუა,
პავლე ხორგუაშვილი (გოგინაშვილი, 82), ვალტერ ხორგუაშვილი (ბერაია, 72), რაჟამაშვილი, ჩაგელიშვილი (სადაღაშვილი (63), ახალკაცი.
მთავარი მწვრთნელი: რამაზ სოღოლაშვილი
გოლები: 1:0 გამეზარდაშვილი (14), 1:1 ვალტერ ხორგუაშვილი (22), 2:1 მეგრელაძე (65).
გაფრთხილება: ვალტერ ხორგუაშვილი (37), თარხნიშვილი (70), დიღმელაშვილი (79), მეგრელაძე (90).
არბიტრი: გიორგი ვადაჭკორია (თბილისი)
ყოველდღიური სპორტული გაზეთი "ლელო"
|
